俗語講：「三歲定終身。」佇我細漢的時陣，媽媽定定共我抱惦大腿，一爿翻五花十色的翁仔冊，一爿唸故事予我聽，彼（hi）時陣，我深深沉迷佇媽媽優美的聲調，佮冊中趣味神奇的內容內底。因此我對冊產生真深的感情，卡袂著就佮冊攬牢牢，當作是寶貝，等到家己學會曉認字，就親像一隻冊蟲，逐工tsiu3（守）佇冊本當中，享受無限的快樂。

有人講：「打開一本書，那親像打開一个世界。」「冊」是前人的心血結晶，讀了予咱增加知識佮智慧，更加是打開心內的門窗，用一世人的精神佮智慧來寫，咱干礁用幾禮拜的時間來讀冊，就共一世人的經驗精華攏吸收起來，變成家已的，咱就親像徛佇伊的肩胛頭，看得比伊閣卡高閣卡遠。

定定讀冊毋但會當予咱心清脾肚開，眼光開闊，閣會當予咱彩色的人生，豐複雜的心靈，做一個知書達禮的人，真正是「一兼二顧，摸蛤兼洗褲。」

讀冊是我一工尚快樂的時陣，我讀過的冊真正多，每一本冊帶予我有無限的感受，讀偉人傳記，予我知影做人要成功就要有好的品行、毅力佮無驚吃苦的心，而且做人愛腳踏實地，一步一腳印，「毋通袂學走，就要學飛」，「吃沒三把蕹菜，就想要上西天。」，「人甘願做牛，就無驚沒犁通拖。」讀歷史冊予我知影孝道，古早人講：「百善孝為先。」做善事是以孝道為優先，愛先友孝咱序大人，俗語講：「在生吃一粒塗豆，恰贏死後治咧拜豬頭。」知影父母疼囝是長流水，我會好好珍惜，友孝我的父母，讀歷史冊嘛有足濟是咱的好模樣，有一句是我永遠攏會記得，唐太宗對梁公講：「以銅為鏡，會當正衣冠；以古為鏡，會當知興替；以人為鏡，會當明白得失。」千古以來，任何代誌攏會變，就是人性未變，歷史教咱的就是智慧。讀大自然的冊，予我行入奇妙的大自然內底，發現生命的奇蹟，咱人就是大自然的一部份，我最近看一本『追蹤師』，這本冊予我了解大自然的神秘，大自然的偉大。大自然中的昆蟲、動物、植物，攏值得咱學習。冊中有一个人伊的行為會當「來無影，去無蹤」，伊覕咧走的功夫好到連傷機警的動物攏感覺袂出來伊的存在。伊教伊的孫仔欲按怎佇大自然中生活，欲打獵時，先教他先佇野地靜靜坐咧，愛坐到佮大自然合著一體，閣講：「一个不曉靜坐e囝仔是沒法度變成穩重的大人。」嘛閣共伊孫仔講：「咱愛追求是精神心靈的滿足，不是去追求物質肉體的欲望。」「你若會當和自己和平逗陣，就會當愛家己，你就永遠不會感到孤單。」所以咱會當愛家己，就會當愛去別人。

看冊予我得到真濟體會佮鼓勵，冊帶予我快樂佮好心情，予我智慧佮自信，予我環遊世界。毋是人講的「古井水雞」，讀冊好比吃土豆，愈吃愈紲喙，又閣親像智慧的寶藏，愈挖愈濟。