坐火車看風景

作者：趙OO 老師

「火車已經到車站，我的心頭漸漸重，看人歡喜來接親人，阮是傷心來相送。」細漢的時，聽著阿媽三不五時唱著這條歌，不僅感覺足好聽，更加對火車產生真大的趣味，因為我從來不識坐過火車，不知影坐火車的滋味是什款，僅僅會凍看著冊內底的相片，肖想有一工我坐著火車，四界的咧欣賞台灣的景緻，迄時陣，我的心情是真烏卒，擱對未來充滿無限的期待。
 

等到有一工，我的央望總算實現啦。媽嗎牽著我的手，歡歡喜喜來到火車頭，看著鐵枝路，火車才慢慢駛入車頭，我就親像一隻飛出鳥籠仔的鳥兒，歡喜甲強強要掠袂條。
 

坐置火車內，我的面靠置窗阿門邊，搧著微微的風，看著青山，看著綠水，也擱有一畦一畦的田痕，甲一個擱一個鬧熱的城市。火車一站過一站，坐的是真舒適，車外的景色宛然是走馬燈，乎人看攏袂赴，擱足像搬電影，一齣沒結局的戲，我也猶原看甲真心適甲趣味。