• slider image
  • slider image
  • slider image
  • slider image
:::

匣子的寶貝

 作者:趙OO 老師

 

      有一工,阿祖講要看我匣子內面裝什麼物件,伊看著我有迄多的「統一發票」,一時煞來忍未條笑出來。阿祖蛇著我的頭殼,一面笑一面講:「憨孫咧,雖然阿祖常常交代,作人愛撿拾,不通討債,才袂乎天公伯摃腳倉,不擱像這款垃圾,乎你畫圖嫌太小張,乎我擦腳倉擱太粗,撿這是要做啥?」「阿祖!阿祖!這著是你不識,這張才不是無路用的紙,伊的名號做「統一發票」,是會凍對獎的,若對有著,政府會給咱真多錢。」我看阿祖的面色有淡薄懷疑,沒啥相信,佇遐泄泄念:「佳奇咦?食到這多歲,僅僅知影銀票會凍開,郵票會凍寄批,敢講『統一發票』是統一公司的優待卷,世間甘真正有這好康的代誌。」我企佇旁邊,聽一下險險啊笑出來,趕緊給阿祖解釋「統一發票」意思。
       
 
     「其實,統一發票是政府為了避免生意人跑漏稅金,才設計出來的一種辦法;阿祖,你千萬不通看這小小的一張薄紙無目地,你看!這張紙條頂懸,清清楚楚紀錄咱買的逐項物件的價帳,絕對沒丁ㄉㄚㄣ抑是漏勾去,而且這營業的資料就會送到政府遐去,一寡仔想要偷走稅,沒想要正正當當作生意的人,就無法度用偷吃步。咱的政府也才有充足的經費來為老百姓做代誌,建設鄉里。這「統一發票」,咱買物件的時陣,一定要會記住拿,人若無乎阮,就愛家己加討,不免歹勢。」阿祖聽我講完,續落去講:「聽孫咧講了,我才知影原來統一發票是這呢有意義的,真正是--愛國擱賺錢,後擺買物件我一定會記住拿統一發票,生意人才沒濫觴來,今暗若不免簽六合彩,對統一發票若不壞,當時開獎愛報乎我知,祖孫啊作伙來對看買。」
       
 
     「開獎啦!開獎啦!」四蕊目珠金金雄,精差一號不相同,熊熊喝咻一聲--「得啊!」雖然只有少少的兩百塊,祖孫兩人猶原笑甲嘴尾裂腮腮。我的匣子除了裝寶貝,也裝不少阿祖的笑聲。從迄陣開始,阿祖開始跟我做伙收集統一發票,咱也有一個共同的期待。