食暗頓的的時陣                    莊OO

      逐工上期待的就是轉去厝食暗頓，媽媽雖然是一個職業婦女，毋那逐工煮暗頓，而且閣準備營養早頓予阮吃，媽媽講：「家己煮的卡鮮啦！」。

      媽媽定定共阮講：「好田地，不如好子弟。」所以阮一放學轉去厝，第一件代誌就是共媽媽鬥款暗頓。我就sing洗米煮飯，小妹洗菜。媽媽一爿煮一爿教阮，阮佇邊惦惦聽，爸爸na下班，嘛是e鬥相共僎暗頓。紲落來，就是阮全家hue啊尚快樂的時陣。

      食飯的時間到啊，全家做伙吃暗頓，嘛是阮全家作伙開講的時陣，媽媽定定借著即个機會教育阮姐妹做人做事的道理，伊講：「做人要有好品性，對序大人要有禮貌。」閣講：「葉子不挽不成叢；囝仔不摃不成人」，伊對家己嘛是足嚴格，定定講：「大狗爬牆，小狗看樣。」這就是阮兜的家教。

      若講到讀冊，媽媽嘛有伊的一套，俗語講：「欲按怎收成，著愛按怎種，平常時著愛養成良好的習慣，咱那樹頭顧予在，不怕樹尾做風颱。」，我共媽媽講：「你放心啦！我毋是一個時到時擔當，無米做蕃薯湯的囝仔。因為我知影『一步一腳印』人愛腳踏實地，好好拍拼，才袂少年袂曉想，吃老著不成樣。」

      有時咧食暗頓時，嘛會足濟心適的代誌，爸爸定定共阮講一寡激骨話，害阮笑的東倒西歪。一頓飯吃足久，阮姐妹嘛會講彼工佇學校發生的代誌。有時是歡喜的代誌，有時是bo7歡喜的代誌，講著歡喜的代誌，全家伙a是笑嘎喙啊離腮腮。Bo7歡喜的代誌，阮逐家就會互相提出建議，嘛會互相加油佮讚聲，tshih个時陣就感覺全家做伙吃暗頓是一件快樂的代誌。全家互相關心即種心情，予我一工的疲勞攏煙消雲散，有這種家庭對阮來講是一種福氣。

      阮兜的暗頓足腥臊的，媽媽定定變換菜色，予阮攏吃不sian，有時食飯，有時食麵，有時炒米粉，有時著包水餃。天氣熱怕阮毋胃口，就煮涼麵，天氣寒就抓雞燉補，買的菜佮用的油攏有特別揀過，三不五時閣會煮碗粿、菜頭粿佮油飯。媽媽講：「食魚食肉、嘛愛菜甲。」伊無希望阮養成揀吃的習慣，阮食暗頓的時間嘛袂使托托沙沙，媽媽講：「魚趁鮮，蝦趁跳。」若親像咱人做空課kan5款。閣講咱做人愛知足，知福閣惜福。因為世間上有足濟人毋物件通吃，嘛有足濟人因為家庭問題，無法度做伙吃暗頓。所以咱有即種環境，咱就要知福惜福，那有能力嘛會當幫助捌人。

      每一項料理攏代表媽媽的用心佮關懷，所以阮全家攏袂想be2佇外口吃暗頓，因為厝內的暗頓有媽媽的愛心佮全家的關懷。