起新厝（甲新教室添妝）！

 作者：趙OO 老師

 甲：（唱）夏天風，正輕鬆，雙人坐船要遊江。有話想要對恁講，不知通也不通。（四季紅）

乙：哪一項。

甲：敢也有別項。

乙：到底是哪一項，你不對緊講。

甲：管！無你是要水管、吸管還是鉛筒管。

乙：管一枝長長咧！你不著緊講來聞香一下。

甲：稍等一下，等人客卡偎咧！緊緊緊，來來來，緊來緊看，慢來減看一半。有合意就喝聲！無和意，請邊仔踦！有買感謝，無買多謝，看啥物？賣啥物？

乙：敢是切仔麵？

甲：不是，不是！

乙：敢是嗲賣電視！

甲：猶原不是！是咱即味－

乙：ㄘㄟ！你是嗲賣啥貨！

甲：今啊日，買有著，俗有著，卡贏汝九斗換一石！汝若買無著，返去心肝會礙虐！

乙：無～你到底是要講不講！

甲：我是ㄉ一ㄝ賣「名聲」，賣一個頂港有名聲，下港大出名，通人呵咾的學校！

乙：聽講佇這間學校教學的老師攏真認真。

甲：不僅安爾，遮足早就有「三語教學」。（國語）

乙：你是講～

甲：歸叢好好～無錯。著是國語、英語甲台語！

乙：那國語、英語，擱有可能，那是台語「牛皮可不是用吹的哦!」（國語）~

乙：那無我甲你考看看!

甲：No  problem。

乙：我講國語，你講台語，啥款？

甲：無問題。

乙：木棉花。

甲：班芝花。

乙：真正是黑甘仔裝豆油~無底看。

甲：你才是坐轎的不知挑轎的甘苦~到擔你才知。

乙：先免臭槍，唱的馬愛考，才也使即。

甲：你惦惦啊聽，你不免驚，唱一條啊古詩詞 。

松下問童子，言師採藥去。

只在此山中，雲深不知處。（寄調宜蘭酒令）

乙：哇！好聽，好聽擱袂跳針。 換考囝仔歌。

甲：我知，我知，著親像～～

    一年仔倥倥，二年仔孫悟空，三年仔吐劍光，

四年仔愛膨風，五年仔上帝公，六年仔閻羅王。

乙：嗯！袂頇顢，反應誠好。莫非你就是人看人驚，鬼看鬼驚惶的~~閻羅王。

甲：啊無～你這歹聲嗽，莫非你是「麻薯師父」喔！

乙：啥物意思！

甲：欠舂啦！（拳頭拇作卜舂人的款）

乙：你毋才是「矮人爬厝頂」。

甲：啥？

乙：欠梯！

甲：好啦!擱考一項卡深的，甲咱學校呵咾一下！

乙：請你斟酌聽：東陽國校好地理，人才濟濟無底比；校長骨力阿沙力，主任老師攏和氣。（寄調狀元樓）

甲：卡實有兩步七，連這碼考你袂倒，莫怪，縣政府會凍恩准恁起大厝。

乙：是咧~~話若要透枝目屎就撥袂離，講著起厝一時煞熊熊忽然間

甲：安怎？

乙：凍袂條。

甲：要起這間厝卡實無簡單，

外多人無暝無日的走闖，

乙：無暝無日的走闖。

甲：縣長、中央民意代表、縣議員先生、學甲鎮公所、代表會、地方士紳以及家長會的牽成。

乙：共同牽成啦!

甲：這多人為著要乎咱這陣囝仔，有擱卡舒適的環境。

乙：付出他們的勞力甲精神，為著不愛辜負咱的期待甲央望。

甲：置今仔這個特別的日子。

乙：著乎咱用上介感恩的心，來祝福東陽國校會凍。

合：年年春、年年富、年年起大厝。

（唱）我愛我的東陽啊！東陽我愛你。校園景色真正美，

讀冊囝仔攏古錐……（寄調台灣小調）

甲：××× ○○○鬥嘴鼓，乎逐家快樂，多謝逐家！